Dysonans poznowczy
Poseł Roman Fritz z Konfederacje bōł ino jednym deputyrowanym, co na debacie godoł blank po naszymu. Przedstawiōł ôpinijo ôd swojij partie, kiero niy ma za nadaniym jynzykowi ślōnskimu statusu jynzyka regionalnego. Ôkrom tego, ciepnył tyż pora przikłodōw tego, że ślōnski je podany na hańdowno polsko godka z czasōw Mikołaja Reja abo Jana Kochanowskiego. Niy byda analizowoł, eli mioł recht, eli niy (podōg mie zapomnioł poraset rokōw wpływōw czeskich, austriackich i niymieckich). Ciepna ino jednym pytaniym: jak chop poradził godać po naszymu, dać przikłody na inkszość jynzyka polskigo ôd jynzyka ślonskigo, godać jak to przaje naszyj godce i tradycjōm, i durch być anty zmianie w gezecu?
Dyć ônego godka musiała być ekstra narychtowano, mało kiery poradzi tak gryfnie godać po ślōnsku przed tulmōm. Jakim szrajbōnkiem mioł to napisane? Bezcōż godoł godkōm inkszōm ôd znōmej nōm godki polskij i durch stoł przi tymu, że to je ta samo godka? Idzie pedzieć, że to bōł przikłod ślonskigo dysonansu poznawczego? Niy chca ciepać ôbskarżyniami, nale to trocha tak wyglōndało.
