Nojważniyjszo ale cycha tego futurystycznego zdrzadła to je fakt, że ôno pokazuje te wszyske informacyje po naszymu. Dō niego niy istniejōm środy, maje, temperatura odczuwalna ani mecze, ino strzody, moje, „czuć choćby” i szpile.
Musza pedzieć, że chocioż używōm kōmputra, co je hned cołki po naszymu i robia nad ślōnskim jynzykym we nowych technologijach już trzinoście lot, to dō mie durch maszina, co dō mie godo po naszymu, to je coś surrealistycznego.
Niyroz sie tak myśla, co by było, jak by wiyncyj maszin naôbkoło nos używało ślōnskigo jynzyka. Dycki mie to zastanowio, że mie take bankōmaty wykluczajōm podwōjnie: po piyrsze bez to, żech je leworynczny, a wszysko w nich je z prawyj strōny, a po druge skuli jynzyka. A na kōniec jeszcze pado, żeby dować pozōr, żeby mie niy ôkradli, po czym kasuje mie piyńć złotych za wypłacynie pijyndzy.
Jo ôd poczōntku je fest przijazny do Ukrajińcōw i jejich lōsu i miynia, że im muszymy pōmogać, ale pamiyntōm, jak we 2022 roku naroz we krōtkim czasie bankōmaty wziōnły spiyrać ukrajiński jynzyk. I żech sie wtynczos myśloł, że jednak jak by niy było to je trocha niysprawiedliwe, że pijōndze idzie wypłacić we tylu jynzykach, a we lokalnym niy.
Możno to skuli tego mōm to poczucie surrealizmu ślōnskigo jynzyka we maszinie? Możno durch żech niy prziwyk do tyj ôsobliwyj jynzykowyj sprawiedliwości?
Pōmału ślōnski jynzyk sie wcisko we rozmajte wirtualne miyjsca. Mōmy przeca Ubuntu, LibreOffice i Firefoksa po naszymu, świynto trōjca biōrowyj roboty. Mōmy tyż mobilnioki jednyj fiyrmy i pora ger. Prowda pedzieć mōmy wiyncyj jak kole 95 procynt jynzykōw świata.
Je żech zicher, że przidzie taki dziyń, że masziny we Gōrnym Ślōnsku wszyske bydōm mieć ôpcyjo interakcyje po naszymu. Możno za piyńć lot, możno za dziesiyńć, a możno za sto. Ale spodziywōm sie, że ani na to niy dōmy pozōr, bo to bydzie już tak normalne dō nos.
Może Cię zainteresować:
