Nojbarzij mie zdziwiyło wtynczos ale to, że na rynku we Żorach bez żodnyj gańby stanyli Borys Budka i Mōnika Rosa, a ś nimi ludzie ze transparyntami, co na nich stoło mynij wiyncyj, że deputowany, co przeszoł do PiS jak tyż cołko ta partyjo to ciule. We swojim aucie śp. Kamil Durczok nagroł wideo ze kōmyntorzym do śp. Silesiona, kaj tyż deputowanymu padoł, że ôn je ciul.
Historyjo sie rada powtorzo
We sobota zrobiyli my kōłko, bo ôto we Katowicach na proteście przeciwko banie do CPK burmistrz Gōrnych Łazisk Aleksander Wyra pedzioł, że „Jak się to mówi bardzo brzydko po górniczemu, zostaliśmy wyciulani jeszcze bardziej”.
Szło by sie sam teroz zastanowić, czy Borys Budka i Mōnika Rosa by stanyli pod transparyntami „ty zjebie”, a Aleksander Wyra by niy mioł problymu ze stwiyrdzyniym: „Jak się to mówi bardzo brzydko po ulicznemu, zostaliśmy wyjebani jeszcze bardziej”. Myśla, że jednak niy.
Jeźli sie wiy, że naôbkoło danego słowa je jynzykowe tabu, to czymu go używać we ôficyjalnyj kōmunikacyji, jak sie je na takij szteli? Jeźli by sie niy użyło polskigo wulgaryzmu, to czymu sie używo ślōnskigo? Jak majōm to rozumieć adresacio takich kōmunikatōw? Że ślōnsko jynzykowo czułość je mynij ważno jak polsko?
Je żech zicher, że żodno z tych ôsōb tak niy myśli. Ciynżko przeca podyjzdrzywać Mōniki Rosy ô to, że dō nij ślōnskość je jakoś mało ważno. Jo miynia, że to wyniko barzij ze braku refleksyje. Polsko kultura je mocniyjszo, tōż świadōmość jeji tabu je srogszo. Bez to niy myśli sie ô ślōnskich tabu we tych samych kategoryjach.
