Coroz rubszy

Już dugo przed tymi Godami żech mioł trzicyfrowo woga, bo sie to zaczło kajś tak kole 2018 roku. Bez lata niy widzioł żech w tym problymu. Ôblycze sie robiyło coroz ciaśniyjsze, to sie kupowało nowe. Niy umiało sie dychać, jak sie weszło na sztworte piyntro, to sie godało, że już sie niy ma dwajścia lot stary. Przeca to żodno turbacyjo.

Aż żech stanōł na wodze jakoś kole 20 stycznia, a ta pokozała bez 110 kilo. Jakech przijechoł ze Anglije, toch wożōł 85 i kożdo nastympno rōwno liczba to bōł mały szok, ale tyn bōł za srogi. Dyć jo niy moga taki naplōmpany żyć.

Zmiany

Wziōn żech czytać, co zrobić. Aha, cuker raus, wōnglowodanōw mynij, biołka wiyncyj i ruszać sie. Porachowołch, wiela potrzebuja dziynnie kaloryji (to może podpowiedzieć kalkulatōr TDEE), i cylowoł żech kożdy dziyń we trocha mynij. Zaczōn żech sie wyrobiać zwyk, żeby co drugi abo trzeci dziyń rano pyndalować na stacyjōnarnym kole, dźwigać hantle i jeszcze pora inkszych rzeczy robić. Społym godzina piytnoście turnowanio.

Ze dwa tydnie mi wziōnło ułożynie sie diety, żeby mieć porachowane kaloryje i poukłodane, wiela jym fetu, wiela biołka, a wiela wōnglowodanōw. Doszoł żech do tego, że śniodōm nojczyńścij naturalny skyr ze granolōm, bananym abo jakimś inkszym ôwocym, na ôbiod miynso – nojlepij flajszbrytle, filet z kury abo mintaj – ze tōmatami, ôgōrkym i surōwkami, na wieczerzo ryba (harynki abo tuńczyk) ze waflami z kukurzice. Wiadōmo, że niy jym dziyń w dziyń jedno i to samo, ale to je to jodło, co moga jeś nojczyńścij, bo mi sie niy studzi, a do tego mało ś nim roboty.

Prōbowoł żech eksperymyntować. Kupiōł żech indonezyjske tempe; to je take jodło ze soje, co mo moc biołka. Za fest smolynio z tym je i niy umioł żech tego uwarzić do porzōndku. Idzie tyż kupić chlyb keto, ale ôn kosztuje dziesiyńć złotych za sztyry sznitki, tōż ôn je do ludzi, co niy majōm co z pijyndzmi robić. Dobrze je za to zainwestować we kapołkowe biołko. To je srogi kamrat, jak sie chce stracić wiyncyj fetu jak muskli, bo jak sie jy za mało biołka, to muskle sie tracōm.

Jak niy ôgupieć

Aha, i woga. Abo mōm pedzieć: dwie wogi. Jedna do jodła, a drugo dō mie. Ta piyrszo, żeby wiedzieć, co sie jy. Ta drugo, co pokazuje ciynżor ze akuratnościōm do stu gramōw, żeby durch mōnitorować siebie i widzieć nawet nojmyńszy postymp. Jak sie niy widzi porzōnd postympu, to sie zaroz ôdechciywo.

Żeby sie niy wypolić wartko, trza tyż niyroz sie przizwolić na jakiś maszket, tōż roz na tydziyń abo dwa idzie sie zjeś pizza abo co tam inkszego. Bez tego by sie do gowy dostało. Za to jak sie niy ciyrpi turnować, to nojlepij to robić, jak sie patrzi na telewizōr. Nojlepij fungujōm filmy abo seriale; niy ma co patrzeć na wiadōmości abo inksze rzeczy. Ani sie niy wiy, kaj sie ta godzina turnowanio straciyła dziynki tymu.

Sukces

16 lipca ta moja drugo woga pokozała piyrszy roz mynij jak 90 kilo. 89,8. Chocioż ani sie niy czuja, chobych bōł na diecie, toch na nastympnych zakupach kupiōł mało paczka chipsōw, żeby pofajrować. Szekulady durch niy jym, ale retujōm mie wysokobiołkowe szekuladowe napoje, co sie je roz za kedy wypija.

Nazod chodza we galotach, co mi ôstatni roz pasowały siedym lot tymu nazod, a na sztworte piyntro wlatuja, choby mi było zaś dwajścia lot. Toć, jeszcze pora kilo musza stracić, alech sie downo tak niy czuł jak teroz. Wōm tyż wiynszuja, żebyście tak samo bez bōlu straciyli swoje ekstra kilogramy, jeźli jakeś mocie.