Import Ameryki dō nos

A jo je przeciwko Halloween u nos, ale niy skuli religije, bo religijo żodnyj role we mojim życiu niy gro. Jo je przeciwko tymu durch importowaniu wszyskigo z Ameryki, a marketingowcy we Polsce bezmyślnie ściōngajōm stamtōnd, co ino idzie. Usłyszeli ô Black Friday, co we Stanach je po Świyńcie Dziynkczyniynio i zaczyno świōnteczny sezōn, to musieli to ściōngnōńć do Polski. Usłyszeli ô Walyntynkach, to musieli je ściōngnōńć do Polski. I niyważne, że już była gotowo lokalno Sobōtka i stykło ino marketing naôbkoło nij zbudować.

Niy, musi być po amerykańsku i mōmy sie rzić ôdmrożać w lutym zamiast sie grzoć we cieple drugij połowy czyrwca. Jak tak patrza na stōn polskigo marketingu, to mōm wōnty, wiela sōm wert te dyplōmy z marketingu i zarzōndzanio, co je tyla lot sztudowało pōł Polski.

Ale to niy sōm ino świynta abo fajry, bo amerykańsko żōna ôd mojigo kamrata przijechała sam na byzuch i była zeszokowano, że tyla publicznego przestrzyństwa je po angelsku i ôna połowa rozumiy. Za to ôd niego matka, co sam żyje ôd narodzynio, ôna połowy niy rozumiy. Jak niy patrzeć, to przeca to je absurd.

Niy naszo kultura

Spytocie mie możno, czymu jo tak stoja ô jakoś cudaczno czystość lokalnyj kultury. No jak by niy było jo sie wziōn za pisanie po naszymu gynau bez to, żech niy mōg patrzeć na niszczynie ślōnskij kultury ôd czegoś, co widza za cudze. Moja perspektywa niy je ale ino przeciwno dōminacyji polskij kultury we Ślōnsku, ale kożdyj inkszyj cudzyj tyż.

Ftoś możno powiy, że dyć niy ma co sie szterować tym Halloween, bo dzieci aby majōm szpas. Ino że dzieci majōm tyż szpas ze kilograma chipsōw abo siedzynio nad telefōnym cołki dziyń, a na to im niy przizwolōmy.