Do politykrōw

Kożdy rok w tym stoleciu je ciekawszy, ale ciynżko pedzieć, żeby bōł weselszy. Bez to winszuja politykrōm, żeby mieli wiyncyj administracyje, a mynij kryzysōw. Za to tym, co politykrōw udowajōm, jo winszuja, żeby w kōncu sie wziōnli za robota, bo za cyrkus przed kamerami my im niy płacymy.

Jednym politykrōm we Gōrnym Ślōnsku winszuja, żeby zaś dostali szwōngu, a drugim, tym tuplowanym, żeby nareście dojzdrzeli, że polityka to niy ma sprawa dō nich. Syńdziōm kōnkursōw winszuja, żeby barzij krytycznie patrzeli na dzieła, co je dostowajōm do ôcyny. Rozmajtym istnym winszuja talyntu czytanio ze zrozumiyniym i dystansu do samych siebie.

Mojymu miastu winszuja kōńca bycio ôdetniyntym ôd świata, bo chyba już wychodzymy pōmału z tego, jak bana i cug były we rymōńcie, a autobusy stoły we korkach, bo Chorzōw rozkopany, a we Siymianowicach sjazd na DTŚ zawarty, bo tyż rymōnt. Tōż Chorzowowi winszuja kōńca bycio rozkopanym, Zobrzu, żeby wyszło z dugōw, Gliwicōm, żeby weszły do Ślōnska, a Katowicōm, żeby spokopiyły, że inksze miasta Metropolije to niy sōm jejich satelity.

Do Ślōnzokōw i inkszych

Ślōnzokōm winszuja, żeby niy boli sie ôtwiyrać gymba, Polokōm żeby roz za kedy ja zawarli, a jednym i drugim mynij kōmpleksōw, to warcij sie dogodajōm. Zogłymbiokōm winszuja, żeby ludzie zmiarkowali, że jejich ziymia to niy Ślōnsk, a Ôpolokōm - przeciwnie.

Wōm za to na tyn Nowy Rok winszuja, żeby ôn Wos jakoś fest niy zdziwiōł. Żeby pogoda niy waryjowała, auta ani koła sie niy psuły, a we portmanyju żeby Wōm nigdy niy brakowało pijyndzy. I, co nojważniyjsze, zdrowio i świyntego pokoju.