Grzegorz Kulik: Stowarziszynie Ôsōb Ślōnskij Norodowości je nazod. Niych to bydzie poczōntek wielkij drōgi

W kōńcu po dziesiyńciu latach, w tym roku rychtowanio po wyroku Trybunału Prow Człowieka we Strasburgu, zaś funguje Stowarziszynie Ôsōb Ślōnskij Norodowości. Pyjtrowi Długoszowi, Wojtkowi Glenskowi i inkszym, co niy dali bez te wszyske lata pokōj, noleżōm sie wielko era i uszanowanie.

Cołki tyn proces ze SÔŚN ôd registracyje bez likwidacyjo aż do prziwrōcynio Stowarziszynio, ôn pokazuje, że Ślōnzocy to sōm ôbywatele, co lepij niż polske gyrichty znajōm i reszpektujōm polske prawo.

Absurdy polskich gyrichtōw

Wiadōmo było ôd samego poczōntku, że prawnie sam wszysko je noleżycie, bez to absurdalne zdowało sie to, co nōm zafundowały polske gyrichty, jak prōbowały Stowarziszynie delegalizować. Słyszeli my, że SÔŚN niy może fungować, bo niy ma takij norodowości jak ślōnsko, a miano może mylić ludzi i dokludzić do tego, że Ślōnzocy by niy mieli progu 5% przi welōnku.

Podug polskigo prawa niy ma tyż rōmskij norodowości, a używo sie takigo terminu i sōm stowarziszynia, co ofyn we mianach abo statutach ô rōmskij norodowości padajōm. Państwo wymogo ale zmian we nazwie ino ôd Ślōnzokōw, bo polski nacyjōnalizm we Rōmach niy widzi tajle polskigo norodu. Bez to do polskigo nacyjōnalizmu to, jak sie Rōmowie nazywajōm, to je jedno.

Podtela, podwiela ta nacyjōnalistyczno ôptyka funguje ino we publicznym dyskursie, to jeszcze niy je jakiś ekstra problym. Gorzij, jak polski wymior sprawiedliwości ofyn ôdciepuje polske prawo i przedkłodo nad nie ideologijo.

Grzegorz Kulik

Ideologijo przed prawym

Tak samo absurdalno zdowała sie ta argumyntacyjo ô tym 5-procyntowym progu. Jak Ślōnzocy by mieli dokludzić do pōminiyńcio tego progu? Jeźli definicyjo norodowyj myńszości do Ślōnzokōw niy pasuje, to jak by sie to miało stać? Magicznie? Naroz we Warszawie by sie przed siebie zmateryjalizowoł nōm ekstra przistymp do parlamyntu? Rōmōm sie jakoś niy zmateryjalizowoł. Ciekawe czymu.

Dobrze, że je Europa

Cołke szczyńście, że je tyn Trybunał, bo aby mogymy na ôstatku iś tam, kaj ludzie niy sōm zatruci norodowōm ideologijōm, tōż poradzōm klarownie wejzdrzeć na take sprawy jak nasza. Po prowdzie czekać trza dugo, bo przeca Ślōnzocy do Strasburga poszli, jak sie pisało 2017 rok, a rozsōndek prziszoł łōński rok, ale nojważniyjsze, że my sie doczekali.

Tōż winszuja nōm wszyskim, żeby my po piyrsze w kōńcu mieli pokōj ze dyktyrowaniym nōm, jak sie mōmy nazywać, a po druge żeby my mieli we Stowarziszyniu porzōmno ôrganizacyjo, co do pozōr na nasze problymy. To je kōniec etapu, ale niych to bydzie poczōntek wielkij drōgi.