Historyjo na jednyj fotografiji. Chruszczow na „Wujku” i jego legyndarno ôzprowka ze ślōnskim grubiorzym

Chruszczow bōł we Ślōnsku w 1959 roku. Jego przijozd ôstawiōł po sobie gynialno anegdota ôd Wszołka.

Jak nawiydziōł dyspozytornia gruby „Wujek” w Katowicach, Chruszczow mioł ôzprawiać bez krōtkofalōwka z grubiorzym na dole i doznać szoku, kej tamtyn pedzioł mu, iże zno ruski jynzyk, bo we Wehrmachcie walczōł z Czerwōnōm Armijōm. A co wiyncyj we Ślōnsku podobnych mu było moc. Setki i tysiōnce Ślōnzokōw były we Wermachcie i my walczyli z Czerwōnōm Armijōm!!! - roznajmiōł

Gomułka, Gierek, Mitręga i inksi polscy „ôficyjele” zaczli gwołtym na roz eklerować Chruszczowowi, iże Ślōnzoki w Wermachcie to była normalność! Chruszczow sie dosłownie ściyk – spōmino Wszołek.

Irytacyje piyrszego sekretorza KC KPSZ niy złagodziyło zapewniynie go ôd grubiorza, iże teroz noleży do PZRP i je kōmunista. Humor mu wrōciōł dopiyro po poru keliszkach kōniaku, wychylōnych w dyrektorskij kancylaryji ôd Wszołka.

Eli ôpisano ôd dyrechtora, przekōmiczno ôzprowka naprowda sie zdarziła, tego ze stuprocyntowōm pewnościōm stwiyrdzić niy idzie. Jednak fotografijo potwiyrdzo, iże Chruszczow w dyspozytorni „Wujka” przeca bōł i bez krōtkofalōwka ôzprawioł.

Fotografista uwieczniōł tyż spōminanych ôd Wszołka Władysława Gomułki, Edwarda Gierka i Jana Mitryngi. Ino że cołkigo towarzistwa na fotografiji ewidyntnie sie dobro launa trzimie. Wszyscy, społym ze Chruszczowym, sōm czymś aż ubawiyni. Możno fotografijo była wykōnano jeszcze przed poruszyniym ciynżkigo tymatu (wtynczos moc barzij aniżeli dzisiej) Ślōnzokōw w Wehrmachcie? Możno tyż Wszołek niyco prziprawiōł swoja relacyjo, a gniyw ôd Chruszczowa bōł ino udowany.

Franciszek Wszołek, co umar niystety w 2021 roku, ôn tych wōntōw już niy rozwieje.