Cyntrum Gōrnoślōnskigo Industryjalnego Ôkryngu wrażōne miyndzy Byńdzin, Sosnowiec i Gōrnoczo Dōmbrowa – taki to nowy Gōrny Ślōnsk projektowało sie we epoce Gierka. „Nowe dyspozycyjno-usugowe cyntrum do cołkigo regijōnu” było wybrano nawet we kōnkursie SARP, co go ôbsztalowało Prezydijum Wojewōdzkij Norodowyj Rady.

„Daleko w prziszłość”

Bōł rozstrzigniynty we styczniu 1973 roku (było aż 41 prac przisłanych). Zwyciynżyli warszawscy architekcio: Zdzisław Hryniak, Wojciech Kubik i Jacek Michalski. Nadgrodzōne były tyż prace ôd m.in. tria Marian Fikus, Jerzy Gurawski, Jan Godlewski i duetu: Jadwiga Guzicka, Krzysztof Rzechowski.

„Architekcio przedstawiyli śmiałe wizyje cyntrum nowego miyjskigo zespołu i wyszli we swojich kōncepcyjach daleko w prziszłość” – rozpolała sie we styczniu 1973 roku „Trybuna Robotnicza”

Tōż dyspozycyjno-usugowe cyntrum? To przeca nowe ôgrōmne miasto, coś jak ślōnsko (pardon, barzij zogłymbiowsko) Brasilia tworzōno ôd fōndamyntōw ôd Oscara Niemeyera. We tym mieście miały sie znojś administracyjne, kulturalne, handlowe, hotelowe i lazarytowe ôbiekty, restauracyje, postrzednie i wyższe szkoły jak tyż akadymiki. Jeszcze sportowo aryna i zielōne teryny. A wszysko we stylu i ze szwōngym, co by za niego niy było gańba twōrcōw „Gwiezdnych wojyn”. Abo amerykańskich futurystōw, co fantazyjowali ô kolōnijach, co je by ludzkość miała zakłodać na Marsie.