Miyjske parki i zielōne dzielnice

Snadnōm rzeczōm powstoł tyż piyrszy miyjski richtich park: Süd Park, to znaczy Połedniowy Park, za czasōw II Republiki przemianowany na park Kościuszki. Pokozoł sie pod kōniec XIX wieku. Ôd niego teryn bōł po leśnym kōmpleksie, co na szczyńście niy tykła go siekyra i miyjsko zabudowa, ino bōł ôstawiōny i zagospodarowany za teryn do rekreacyje do miyszkańcōw miasta. Za jakiś czas teryn parku powiynkszyli, posadziyli tyż strōmy na Beatestrasse (ulica Beaty, potym Kościuszki), co dō niego wiydła. We latach II PR nazwanōm Prōmynadōm Kościuszki. Prōmynada we Katowicach!

Za czasōw II Republiki wielość zielyni we Katowicach wartko urosła. Ale niy dziynki architektōm landszaftu ino politykōm. We 1924 roku, ku zmocniyniu polskigo żywiołu we głownym mieście ślōnskigo wojewōdztwa, prziłōnczyli do Katowic dotōnd ôsobne sōmsiednie gminy, take jak Ligota, Brynōw i Zołynże. Efekt uboczny to było to, że choćby za ausztojer dały Katowicōm swoje przepiykne i rozlygłe zielōne teryny, co jeszcze miały moc wiejsko natura, ze ôgrodami i sadami, a do tego siyłōm hektarōw lasōw. Ligota wziōnła zmiyniać swōj karakter, powstała w nij tm. urzyndniczo kolōnijo. Przi jeji modernistycznych wilach powstawały niyroz piykne ôgrody. Perfekcyjnie zaplanowali tam tyż zielyń we publicznym przestrzyństwie. Jedna ze ulic była zaprojektowanoza ôsiedlowy deptok, a kożdo ś nich ôbsadziyli strōmami inkszyj zorty. Katowicōm przibōł tyż swojisty park we formie panewnickij kalwaryje. O zielōno, połno uroku dolina czystyj, niytykniyntyj jeszcze wtynczos kōmunalnymi i industyjalnymi ściekami rzyki Kłodnice.