Pałac i dworski park to jedno założynie

Zōmeczek ôd 2009 roku noleży do miasta Siymianowice, co dosłownie wyrwało go ze rōnk ôd gruby, co upadała (snadnōm rzeczōm we gyrichcie). Durch suży kulturze, je w nim Cyntrum Kultury Zōmeczek, filijo Siymianowskigo Cyntrum Kultury. Dzieci chodzōm sam na artystyczne zajyńcia, a majoryntni mogōm posuchać kōncertōw. Musi być noleżycie, tōż niy rychtuje sie sam kōncertōw disco-polo, ino klasycznyj abo aktorskij muzyki, abo trefy ze ciekawymi ludźmi. Srogsze wydarzynia sie robi we połōnczōnym ze ôranżeryjōm zdrzadlanym zalu, jak sie mieści 130 ôsōb.

Pałac nyńci niy ino ôranżeryjōm ze bōntymi witrażami, ale tyż arabeskowym, lekim zadaszyniym nad przodnim wchodym. Na elewacyji ôd strōny podjazdu sōm tyż reliyfy ze postaciami gwarkōw, co sie ôdwołujōm do berkmańskich tradycyji, ze napisami „Niech nam żyje górniczy stan” i „Szczęść Boże”.

Zōmeczka ale niy noleży traktować za pojedynczy, ôsobny budōnek.

– Ôn je jedno ze parkym Gōrnik naôbkoło niego, downij parkym dworskim, i szumnymi budōnkami, co w nim ôcalały, bp. myśliwskim dōmkym ze wopiynia (ôficyjalne miano to Dom Leśniczego i Ogrodnika – przip. red.), co sōm wyglōndo jak zōmek we miniaturze – klaruje Łukasz Zimnoch.

Prezes „Wrazidloka” dowo tyż pozōr na to, że pałac stoji blisko moc ważnego styku drōg, co było typowe do siedzib ôd arystokratycznych rodōw, tak było tyż we Świerklańcu. Ze pałacu ôd Rheinbabenōw bōł prosty dojozd do Wielkij Dōmbrōwki, ku Maciejkowicōm, Starymu Chorzowowi i dzisiyjszym Katowicōm, w tym Wołnowca, kaj Hohenlohe-Öhringen mioł rozliczne werki.

– Siymianowice majōm moc szumnyj architektury – miyni Łukasz Zimnoch. – We XIX wieku miasto i ôkoliczne ôsady, niyskorzij wcielōne do gminy Siymianowice, miały moc piniyndzy, stały sie bogate. Ôtwiyrało sie siyła industryjalnych werkōw, grubōw, hut. Moc ôsōb przijechała sam do roboty. Siymianowice tyn XIX-wieczny fiber wielkij industryje wykorzistały – kōńczy Zimnoch.